V Encontro da Comunidade de Accións e Saberes Arredor do Rural

 

O V Encontro da Comunidade de Accións e Saberes Arredor do Rural constituíu un capítulo máis da nosa colaboración con esta iniciativa tan interesante, chea de saberes e moi activa, que consegue conectar universidade e mundo rural, educación e sustentabilidade desde e para o rural.

Coma outras veces, presentáronse os últimos proxectos colaborativos realizados entre as asociacións e os/as universitarios/as participantes; fíxose un repaso do recorrido feito ata o de agora; dúas mesas redondas moi interesantes; e a presentación do libro "Arredor do rural. Comunidade de saberes e innovación socio-educativa":

"O documento, cun total de 29 autores, nace coa idea de deixar por escrito todas aquelas conclusións que ían xurdindo dentro do marco do proxecto Arredor do Rural. A iniciativa botou a andar co obxectivo de converterse nun espazo de encontro entre persoas que traballan en distintos ámbitos e, sobre todo, nunha ponte entre o coñecemento académico, propio das universidades, e o popular, ao que segundo o coordinador «non se lle da a importancia que merece».

A obra, publicada este 2023, pretende ser un compendio de diferentes visións que serva, entre outras cousas, para que o alumnado de estudos superiores vexa no rural un lugar no que poder traballar e desenvolver a súa vida: «As opcións de futuro sempre se expoñen mirando ao urbano e nós queremos construír unha visión alternativa»."

Achegámosvos o vídeo resumo da xornada.

www.arredordorural.org